Zofaten kan luahchin ramte hi midang ta kan hnehchhuh a nilova, kan chenna atana Lalpa min buaisaih sak a ni a. Mahniin ro kan inrel thin. Kan ram leh hnam himna a lo derthawn tak avangin, zalenna sual a lo ngai ta a. Kan hnam sipaite khan ram leh hnam leh kan sakhaw tan nun an hlan ngam a, an hlan a ni tih khawvel hmaah an lo lantir tawh a ni, "a ti. 

Pu Mapiana chuan, FCAA chu  tlanchhe chung leh midang puhmawh chunga passed a ni. MLA tamzawk ten an zirchiang hmanlova, NGO leh mipuiten an ngaihdan pawh an sawive hman miahlo. ZPM sorkarin hlauhruk an neih avangin opposition MLA ten passed pui ve se, hmingchhe ve se ti niawm takin, House ah an ngawi, tiin an puhlui ngar ngar a. Assembly House chhunga vote abstain awmzia an hrelo nge anmahniin an pass ngamlo zawk? Speaker in session zawh hnua press mite hmaa a sawifiah a a tul ta hial mai leh, house leader CM in thudiklo a sawilo, tia a chhan angai te kha a zahthlak takzet a ni, a ti. 

Mizoram kawngchhiat chhan hi Chief Minister vang a nih thu sawiin, Pu Mapiana chuan, RTI hmanga zawhna chhanna atanga a landanin, Kawnpui-Khamrang kawng siamnan Mizoram PWD in kum 2025 chhungin vawi nga (5) finance department ah a dil tawh a. Vawi hnih pek ni tawhin, cheng nuai 164.66 chiah hmuh a ni a. 20th Jan, 2025 a dil Bilkhawthlir-Kolasib leh Kawnpui-Khamrang kawng siamna tur chu nuai 64.66 pek an ni a. January 27, 2025 a dil nuai 497 vel pek an nilo  a. February 21, 2025 a dil pawh pek an nilo leh bawk. July 29, 2025 a dil erawh amah CM hova rel anih vang anih a rinawm, pek a ni ve ta hram a ni. Chuvangin, kan ram kawng, kan châk lakluhna kawng chhiat chhanah CM hi mawhphurhtu ber a ni, a ti. 

MNF GS chuan, ZPM hian an sorkar tirh phat atangin chhiah lut lo zawngin departmental work, work supervisor tih leh restricted tender, party mi induhsakna an uar em em a, kawngchhiat vangin sumdawngte bungrua a thleng tha lova, sorkara chhiah lut leh sum lengvak a tlem phah em em a ni. GSDP, kan economy tehna pawimawh ber chungchangah, CM in Budget Document pawimawh ber, Budget speech-ah dawt pachal a sawi duh mai te kha a pawi em em a, CM-in GSDP tlakhniam chhan leh sawrkar leiba punna chhanah GSDP chhut dan thar hmang anga budget speech-a a sawi chu a dik lo tih RTI chhanna atanga finfiah a ni.  Kan GSDP tlahniam duai duai leh kan leiba sangchho zel sawimam a tum avangin Chief Minister hian ngaihdam a dil ngei tur a ni a. Dawt sawi chin hi sim ngei bawk rawh se, a ti. 

Pu Mapiana chuan, ZPM sorkar hnuaiah zirtitute sawn leh vau a hluar hle a ni tih sawiin, zirtirtu 425 lai transfer an ni tawh a. Kan ram nghahfak zirlai naupangte thlamuang taka an enkawl theihnan, zirtirtute laka lal hrawtna ni duhtawk tawh turin sorkar a hrilh a. 

Sawhthing leina sum tamtak chingpen pawh hi, sual hua inti, danglam tur inti ZPM sorkar hian  tawngkaa sawi duhtawk mai lovin, general consent an lo pek tawh CBI chhuichhuah tir ngei rawh se, a ti bawk.